ඔබ සිත්ගත් ගීයක් මට දැනෙන හැටි - සැඳැ කළුවර කුර ගගාවිත් (දෙවන දිගහැරුම)

පෙම්වතෙකුගේ වෙන්වීම දරාගත නොහැකිවූ හුදකලා සිතකට නැගෙන සිතිවිලි රචනයකට නංවමින් ගැයෙන මේ ළයාන්විත ගී රාවය, සොදුරු හදවත් සලිත කරවන තරම් මියුරු හඩකින් ගායන කරන්නේ සංගීත් විශාරද නන්දා මාලනී ශූරිණියයි. මෙහි ගීපද රචනා කොට ඇත්තේ මඩවල එස් රත්නායක මහතා විසිනි.

සැබැවින්ම සුන්දරවූ ආදර ලෝකයේ ආදර දෙහදක ඇතිවන්නාවූ ළයාන්විත බැදීම්, ප්‍රාර්ථනා හා බලාපොරොත්තු එමටයි. සිතන පතන එවැනි දේ අප බලාපොරොත්තු වන ලෙසින්ම ඉටුනොවේ නම්, ආදර හදවත් තුළ උපදින්නේ දුකක් වේදනාවක්.  සැන්දෑ කලුවර දසතින් ගලා එන රාත්‍රියක් ඔබට සිහිවේ නම්;  ඒ රාත්‍රිය ඝන අදුරෙන් පිරී තිබේ. ඒ රාත්‍රිය නිසොල්මන්ය. හැගුම් බරය. එවැනි පරිසරයකදී තනිවූ ආදරවන්තයනට තම ආදරවන්තිය පිළිබදවත්,  ආදරවන්තියනට තම ආදරවන්තයා පිළිබදවත් ආදරණීය සිතුවිලි වලින් සිත පිරී ඉතිරී යයි. එහෙත් තමා ආදරය කරන ආදරවන්තයා තමා ළගනැති බව දැනෙන විටදී හුදකලා වූ සිත පාලුව නම් වූ ඝන අන්ධකාරයෙන් වෙලී සිතට නැගෙන්නේ සාංකාවක්.

"සැඳැ කළුවර කුර ගගාවිත් - ඔබේ පැල්පත මගේ දසුනින්
ඈත් වූ සඳ මගෙ සරා සඳ - තනිවෙලා මා තනිවෙලා ..."

ඇය තනිවී ඇත. සැදෑ කලුවර නම් වූ පාලුව, කාන්සිය හෙමින් හෙමින් ගලාගෙනවිත් හදවත නම් වූ ඇගේ පැල්පත ඇගේ ආදරවන්තයාගේ දර්ශනයෙන් පිරී යයි. නමුත් ඇය ලග ඔහු නැත. සිත තව තවත් සාංකාවෙන් පිරී යයි. අදුරු රාත්‍රී පරිසරය සිතට දැනෙන ඒ පාලුව, සාංකාව වඩ වඩාත් ත්‍රීව්‍රකරවයි. එහෙත් ඔහුගේ ආදරයෙන් වල්මත් වූ ඇයට ආදර සිතින් වල්මත් වී ශෝකීලාප දෙමින් විදදරා ගැනීම හැරුනු කොට කල හැකි අන් කිසිවක් නොමැත.    

"වළාකුළකුදු නොමැති අහසේ - මලානික වූ මගේ සිතුවිලි
ගල් ගැසී ඇත පාළු වී ඇත - අඳුර පමණක් රජවෙලා "

එකදු වළාකුලකුදු නොමැති අදුර පමණක් රජකළ, සුන්දර රාත්‍රියක, සද දෙස බලාගෙන සිහිල් පහස ලබමින්, එකල අප සිහින මැව්වේ සදාතනිකවම ප්‍රේමයෙන් බැදී සිටීමට. එහෙත් කාලය අපට බොහෝ දේ සිතන්නට ඉතිරි කොට තනිකම පමණක් උරුම කරමින් ඔබ මගෙන් දුරස් වී ඇත. අදින් පසු මා මගේ දිවියේ අලුත් මංඉසව් සොයා තනිවම සැරිසැරිය යුතුව තිබේ.

"ඔබේ ලෝකය මගේ ලෝකය - අතර ඇත්තේ රැයක් පමණයි
ගව් ගණන් දුර ජීවිතේ බර - මගේ හිස මත බරවෙලා...."

එහෙත් ආදරවන්තියක් වූ ඇය කිසිත් ලෙසකින් තම ප්‍රේමවන්තයා කෙරෙහි ද්වේෂයක් ඇති කරනොගනී. සියලු වේදනා විදදරා ගැනීම හැරුනු කොට...ඔහු වෙනුවෙන් ඇයට කළහැකි කිසිවක් නොමැත. ඒ අදුරු රාත්‍රියේ ඇගේ ශෝකීලාප හැගුම් මුලු පදවැල් පුරාවටම ලයාන්විත හඩින් ගැයෙද්දී අප නිතැතින්ම ඒ රාත්‍රිය තුළ විරහවෙන් වේදනා විදි මනසකින් සන්තර්පනය වේ.

සැඳැ කළුවර කුර ගගාවිත්
ඔබේ පැල්පත මගේ දසුනින්
ඈත් වූ සඳ මගෙ සරා සඳ
තනිවෙලා මා තනිවෙලා ...

වළාකුළකුදු නොමැති අහසේ
මලානික වූ මගේ සිතුවිලි
ගල් ගැසී ඇත පාළු වී ඇත
අඳුර පමණක් රජවෙලා

සැඳැ කළුවර කුර ගගාවිත්
ඔබේ පැල්පත මගේ දසුනින්
ඈත් වූ සඳ මගෙ සරා සඳ
තනිවෙලා මා තනිවෙලා ...

ඔබේ ලෝකය මගේ ලෝකය
අතර ඇත්තේ රැයක් පමණයි
ගව් ගණන් දුර ජීවිතේ බර
මගේ හිස මත බරවෙලා....

සැඳැ කළුවර කුර ගගාවිත්
ඔබේ පැල්පත මගේ දසුනින්
ඈත් වූ සඳ මගෙ සරා සඳ
තනිවෙලා මා තනිවෙලා ...

මා සිත්ගත් ඒගීතයට ඔබත් කැමතිනම් පහත සබැදියෙන් රසවිදිමින් මේ සොදුරු නවතැනේදී ගීතවත්ව සමීප වෙමු....

ඩ්‍රොප්බොක්ස් (Dropbox) හෙවත් නොමිළේ ලැබෙන Online දත්ත ගබඩාව

අපගේ පරිගණකයේ ගබඩා කර ඇති වැදගත් තොරතුරු යාන්ත්‍රික දෝෂයකින් එහෙමත් නැතිනම් මෙහෙයුම් පද්ධතියේ දෝෂයකින් හෝ පරිගණක වයිරස් ආසාදනයකින් භාවිතයට ගත නොහැකි පරිදි හානි වුවහොත්, නිසි පරිදි  Backup කරලත් නැතිනම්, නැවත ඒගැන බලාපොරොත්තුවක් තබා ගැනීමත්  සිහිනයක්. සංයුක්ත තැටි, ඩිජිටල් විඩියෝ තැටි, USB ෆ්ලෑෂ් ධාවකයන්  හෝ බාහිර දෘඩ තැටි වැනි මොනයම් හෝ ක්‍රමයක් මගින් පරිගණකයේ ඇති දත්ත Backup කලත්, සමහර අවස්ථාවලදී ඒවයේ ක්‍රියාකාරිත්වය සම්බන්ධයෙන් ද අප තුළ ඇත්තේත් බලවත් අවිශ්වාසයක්.

ඩ්‍රොප්බොක්ස් (Dropbox) මෘදුකාංගය එයට හොදම විසදුමක්. එමගින් නොමිළේ ලබා දෙන Online දත්ත ගබඩාව සැබවින්ම අස්වැසිල්ලක්. එය අන්තර්ජාල සබදතාවය පවත්නා ඕනෑම තැනක සිට දත්තයන්ට පහසුවෙන් ප්‍රවේශ වියහැකි, ඒවා තවත් කෙනෙකු හා බෙදාගත හැකි සරළ මෘදුකාංගයකි.

ඩ්‍රොප්බොක්ස් (Dropbox) මෘදුකාංගයහි ක්‍රියාකාරීත්වය ඉතා සරලයි.  ඩ්‍රොප්බොක්ස් මෘදුකාංගය ස්ථාපනය කර ගත් පසු අපගේ පරිගණකයේ Dropbox නම් ෆෝල්ඩරයක් ස්ථාපනය වනවා. අප කළ යුත්තේ අපට රක්ෂිත කිරීමට (Save) අවැසි ගොනු (Files) මෙම ෆෝල්ඩරයට පිටපත් (Copy) කිරීම පමණයි. එම ගොනු ඩ්‍රොප්බොක්ස් අඩවිය සමග Auto Synchronization වීමකට ලක් වෙනවා. එනම් පරිගණකයේ එම පිටපත තැන්පත් වෙන විටදීම, අන්තර්ජාල සබදතාවය ඇතිවිටදී එය ඩ්‍රොප්බොක්ස් (Dropbox) අයිතිකරුවන්ගේ සර්වරයක ද එකවරම තැන්පත්  (Save) වීමක් සිදුවෙනවා. මෙසේ ගබඩා වන දත්ත වෙත ලොව ඕනෑම තැනක සිට අන්තර්ජාලය හරහා ප්‍රවේශ වීමේ හැකියාව ද ලැබෙනවා.

වඩාත් වැදගත් දේ නම්, ඩ්‍රොප්බොක්ස් මෘදුකාංගය වින්ඩෝස්, ඇපල් මැක් සහ ලිනක්ස් මෙහෙයුම් පද්ධති සඳහා නොමිලේ ලබා ගත හැකියි. එය iPad, iPhone වල මෙන්ම Android  ජංගම දුරකථන තුළද පහසුවෙන් ස්ථාපනය කර ගැනීමට පුලුවන් වීම තවත් පහසුවක්.

එමෙන්ම, ෆේස්බුක් මතට එක්ව ඇති නවතම පහසුකම් අතර ඩ්‍රොප්බොක්ස් මත රදවා ඇති දත්ත ගොනු පහසුවෙන් තම ෆේස්බුක් කන්ඩායම් අතර බෙදා හදා ගැනීමේ හැකියාවද සදහන් වනවා. මෙම පහසුව අත්වීදීමට නම් පලමුව තම ඩ්‍රොප්බොක්ස් ගිනුම, ෆේස්බුක් ගිනුම සමග සම්බන්ද කල යුතු අතර ඉන් අනතුරුව Facebook Wall මත එම ගොනු පෙන්වීම ඇරබෙන බවටයි පැවසෙන්නේ.

තවද Facebook මිතුරන්ට ඩ්‍රොප්බොක්ස් වෙත යවන ආරාධනාවක් ඔබේ මිතුරෙකු පිළිගතහොත් ඔබට තවත් අමතර මෙගා බයිට් 250ක අවකාශයක් වෙන් වෙනවා. එලෙසට ගිගාබයිට් 3ක් දක්වා අමතර අවකාශයක් ලබා ගැනීමට පුළුවන්  බවටයි සැළකෙන්නේ.

ඩ්‍රොප්බොක්ස් මගින් නොමිළේ ලබාදෙන 2GB ධාරිතාව මගින්, අපේ සම්පූර්ණ ලට්ටපට්ට සියල්ලම ගබඩා කිරීමට ලැබෙන ඉඩකඩ සීමා සහිත වුවත්, එය අපගේ වැදගත් තොරතුරු රැක ගැනීමට නම් සාර්ථක පිළියමක්.

ඔබ තවමත් ඩ්‍රොප්බොක්ස් (Dropbox) මෘදුකාංගය භාවිතා නොකරන්නෙක් නම්, පහත ප්‍රවේශය මගින් ඩ්‍රොප්බොක්ස් (Dropbox) සබැදියට ලගාවී අදම වෙනස අත්විදින්න. බයක් හැකක් නැතුව ඕනෑම භාහිර බලපැමකින් නොසැලෙන්න හිදහදාගෙන ෆන් එකේ ඉන්න පුලුවන්.



පතල් කවි තුලින් හෙළිවන අතීත පතල්කරුවාගේ වතගොත

පතල් ජීවිතයත් මුහුදු යාමත් එකයැයි පැරන්නෝ කියති. එහෙත් එය කොහෙත්ම සමකළ හැකියැයි සිතිය නොහේ. රැයක දවාලක වෙනස නොදැනෙන, පොලොව මට්ටමෙන් අඩි සිය ගණනක් යට සම්පත් සොයමින් දෝනා උමං මැද ගෙවන පතල් ජීවිතය සාගර ජලය මතුපිටේ ගෙවුනු මුහුදු රැකියාවට වඩානම් අතිශයින් කටුක වන්නට ඇති. එවන් ලොවක් තුල මුලු දවසම ගතකෙරූ එදා පතල්කරුවා තමාගේ සිතට දැනුනු වෙහෙස, මහන්සිය, කාන්සිය මගහරවා ගැනීම පිණිස තම සිතට නැගුණු සිතුවිලි කවි පද ලෙසින් පවසන්නට යෙදුණි. 

"ඉන්නේ දුම්බරයි මහ කළු ගලක් යට
කන්නේ කරවලයි රට හාලේ බතට

බොන්නේ බොර දියයි පූරුවෙ කළ පවට
යන්නේ කවදාද මව්පිය දකින්නට"

පතල් කර්මාන්තයක් ලෙස පටන්ගත් ඈත අතීතයේ, පතල් සේවයට පැමිණි බොහොමයක් කම්කරුවන් සංක්‍රමිකයන් බව පතල් කවි සියුම්ව අධ්‍යයනයේදී අපට හැගීයේ. "යන්නේ කවදාද මව්පිය දකින්නට" "එනම්, ඔවුනගේ දෙමාපිය නෑදෑ හිතමිතුරන් තමන් සේවයකල පතලට ආසන්නයේ පදිංචිකාරයන් නොවන බවක් පෙනේ. කෙසේනමුත්, කාලයගේ ඇවෑමෙන් සමහරක් පතල්කරුවන් අසළ ගම්දනව් වලින් ආවාහ විවාහ කරගෙන පැලපදියන් වී පතල ආසන්නයේම ගම්වැසියන් වන්නට ඇති.

අධ්‍යාපනික අංශයන් වුවත් නොදියුණුව පැවති යුගයක ජීවත් වන්න, මිළමුදල මතම පමණක් පිහිටා වැඩුනු මනසකින් තම හාම්පුතුන් වෙනුවෙන් දැඩිකැපකිරීමක් කල ඔවුන්ගේ සිත් පොහොසත්ය. ආර්ථික අපහසුතා තිබුණත්, විවේකී දිනට තම උපන්බිමට ගොස් තමා ඇතිදඩිකල මෑණියන් දැකීමට යන්නටවත් මානසික නිදහසක් හෝ ඉඩක් නොලද බව හැගවෙන පහත කවි එදා පතල්කරුවාගේ අසරණත්වය මොනොවට විදහාපායි.

"මහත්මයෝ දුප්පත්කම බලනවද
අතේ තියෙන පොඩි කරගැට පෙනෙනවද
පොතේ තියෙන පඩි ගණනත් පෙනෙනවද
ගමේ යන්ඩ ඕඩරයක් ලැබෙනවද"

එමෙන්ම එදා පතල්කරුවා ඕනෑම දෙයකට සූදානම්, බියක් නැති හැඩිදැඩි වූවෙකු බවත් විටෙකදී හැගී යයි. තමන් නිසි අධ්‍යාපනයක් නොලද නිසා හෝ, තමනට රිසිදේ නොලැබෙන නිසා හෝ, තමා කිසිවෙකුටත් කිසිවිටෙක දෙවෙනි වීමට සූදානම් නැතිබවක් මේ කවියෙන් පවසයි.

"බාස් අයියේ මට බැහැ වැඩ කරන්නට
දහස් ගණන් පඩි තිබුණත් පොතේ මට
පාස් උනේ නැහැ මම කිසිම වැඩකට
බාස් අයියේ මම යනවා හෙට ගමට"

ඇසට නොපෙනෙන ආධ්‍යාත්මික බලවේගයන් සම්බන්ධයෙන් එදා තිබුණේ සදාතනික වූ බැදීමක්.  කෙතරම් කටුක අමිහිරි වුවත්, තමා කරන රැකියාවේදී දේව රැකවරණය, දේව ආරක්ශාව නිතරම ප්‍රාර්ථනා කලබව සමහර කවි තුළින් ප්‍රකට වේ.

"මහ බෝගලට අපි ඇවිදින දුකා
ගැට්ට නැති මුට්ටි පොඩියේ උයා කකා
පනන් විස්ස ණය වෙනකොට සිතේ දුකා
සතර වරම් දෙවි පිහිටෙන් නොවන් දුකා

මල් පැල පහන් ඇවිලෙන්නේ දෙවියන්ට
පොල්තෙල් පහන් ඇවිලෙන්නේ පෙල දිගට
බිත්ති දෙකට සවි කරලා මුක්කු වැට
සතරවරම් දෙවි පිහිටයි අපි සැමට"

ආදරයට සීමාමායිම්, කාලවකවානු, උස්පහත්කම් නොමැත. දිනපතා උදේ සවස පතල තුලට බසින පතල්කරුවා යනු තවත් පෘතග්ජන මිනිසෙක්. ගත කෙතරම් හැඩිදැඩි වුවත්, ඔහුගේ සිතට වුවද ආදරය, කරුණාව නොදැනුනා නොවේ. එවන් මොහොතකයි මෙවැනි කවියක් කියවෙන්නට ඇත්තේ. 

"ඉර පායා එනකොට රැස් විහි දෙනවා
සද පායා එනකොට තරු දිලි සෙනවා
මල් පිපිලා සුවදට බමරුන් එනවා
ලද නුඔ මතක් වෙන කොට හදවත දනවා"

අපමණ මහන්සිවී තම හාම්පුතුන් වෙනුවෙන් දැඩිකැපකිරීමකින් සේවය කළ එදා පතල්කරුවා ප්‍රශ්ණ, අභියෝග හමුවේ නොසැළී, නොවෙනස්ව තම රාජකාරිය ඉතාම ඕනෑකමින් කැපකිරීමෙන් විනෝදයෙන් ඉටු කලආකාරය පතල් කවි අධ්‍යනයේදී අපගේ සිත්සතන් වලට දැනේ.

පෙර පළකල පතල් කවි කියවන්න මෙතැනින්:

1. පතලක් තුලදී ඇතිවන හැගීම් කවියක් ලෙසින් - පතල් කවි (Pathal Kavi) I
2. පතලක් තුලදී ඇතිවන හැගීම් කවියක් ලෙසින් - පතල් කවි (Pathal Kavi) II

Huawei E153 ඩොන්ගල් එකක් Unlock කරගන්නේ මෙහෙමයි

Huawei E153 මාදිලියේ ඩොන්ගල් එකක් unlock කරගන්නේ කොහොමද කියලා ඔබත් හොය හොයා හිටියනම්, මේ පියවරවල් ඔබට ඉමහත් අස්වැසිල්ලක් වනවා නොඅනුමානයි.

ඔබ ලග ඇති ඩොන්ගල් එක පහසුවෙන් unlock කරගැනීමට නම්, පළමුවෙන්ම කලයුත්තේ එහි ඇති firmware එක update කරකර ගැනීමයි. ඒ සදහා පහත link එක click කිරීමෙන් Huawei firmware update software එක download කරගත හැකියි.



ඉන්අනතුරුව ඩොන්ගල් එක පරිගනකයට plug කර ගන්න. (ඔබ එය කලින් භාවිතා නොකල ඩොන්ගල් එකක් නම්, ඒ සමග එන Default software එක install කරගත යුතුමයි. නැත්නම් ඔබගේ පරිගනකය ඩොන්ගල් එක detect කර නොගනී) දැන් ඉහත link එකෙන් donwload කරගන්නා ලද E153Update software එක run කරන්න. යම් අවස්ථාවකදී ඔබගෙන් password එකක් විමසයි. (password එක අවශ්‍ය වනුයේ ඩොන්ගල් එකත් සමග එන firmware එක flash කර ගැනීමට හා අලුත් firmware එකට ඩොන්ගල් එක  update කර ගැනීමටයි.)  

Password එක ලබා ගැනීම සදහා Huawei modem/dongle unlock code calculator එකක් භාවිතා කලයුතු වෙනවා. මොහොතක් සයිබර් අවකාශයේ සොයමින් සැරිසැරුවොත් ඔබට මේ සදහා වඩාත්ම ගැලපෙන මෘදුකාංගයක් සොයා ගැනීම එතරම් අපහසු වෙන්නේ නැහැ. එසේ සොයද්දී ලැබුණු පහත link එකෙන් unlock code එක සහ flash code එක සොයාගත හැකියි. හැබැයි මේ සදහා ඔබට ඔබගේ ඩොන්ගල් එකේ අංක 15 කින් සමන්විත IMEI අංකය ඇතුලත් කලයුතු වෙනවා.  IMEI අංකය ඇතුලත් කල පසු ලබා දෙන flash code අංකය තමයි ඔබගේ මෘදුකාංගය update කර ගැනීමට අවශ්‍ය වන password එක වන්නේ.

Password එක ලබාදීමෙන් අනතුරුව software update වන අතර, update වූ ඩොන්ගලය ඕනෑම සිම්පතක් යොදා ගනිමින් භාවිතයට ගතහැකියි.  අපහසු නොවූ මේ ක්‍රියාවලිය ඔබට කෙදිනක හෝ ප්‍රයෝජනවත් නොවේදැයි ඔබම පරීක්ෂා කර බලන්න.

"Learn from yesterday, live for today, hope for tomorrow. The important thing is not to stop questioning. Curiosity has its own reason for existing." 

- Albert Einstein

ඔබ සිත්ගත් ගීයක් මට දැනෙන හැටි - බණ්ඩාර අයියේ (පළමු දිගහැරුම)

සිරස සුපර්ස්ටාර් තුළින් ජනප්‍රියත්වයට පත් අජිත් බණ්ඩාර හා ශානිකා මධුමාලිගේ හඩින්, චමින්ද සමරනායකගේ සංගීතයට ගැයෙන මේ අලුත් ගීතයේ පද රචනය සන්ජය වික්‍රමතුංගයන්ගෙනි.

තමාට පමණටත් වඩා ආදරය කරන පෙම්වතියගේ හිතට නැගුනු අහිංසක ආශාවනට පිටුපා යානොහී තරම්වූ ස්නේහයකින් ගැයෙන මේ ගීතයෙන් ආදරයේ සොදුරුතම පැතිකඩක් මනාවට පිළිබිඹු කෙරෙයි. ජීවිතයේ සෑම දෙයක්ම මුදල් මතම යැපෙන තරගකාරී ලෝකයක අන් කවරදේ නොලැබුනත්, ඒ සදහා වියපැහදම් කරන්න අතමිට සරුනොවුනත්,  ඔවුනට ඔවුනගේ ආදරයේ මහිමයෙන් බලාපොරොත්තු වන සියලු  ප්‍රාර්ථනාවන් ඉටුවේය යන විශ්වාසය සිත් තුළ තිබේ.

"ලොකු මුදලක් දී නොගත්තාට පුජා වට්ටිය - දෙවියන් ඉටු කර දේවි සංසාර පැතුම් පෙල

ඉල්ලන්න නොවේ ආවේ දෙවියනි නුඹ ගාවට - මොනවත්ම එපා අපි දෙන්නට තියෙනවා සෙනෙහස"

එය අවසාන පැදිපෙලෙන් එලෙසට සියුම්ව අපේ හද තුළට හැගේ.

බණ්ඩාර අයියේ මේ පෝයට කතරගමට යං

දෙවියන්ගෙන් ඉල්ලන්න නොවෙයි වැඳලා එන්න යං

මධුමලීගෙ ආශාව නිසා එහෙනම් අපි යං

පහුගිය දොහේදි වෙච්ච බාර යළි සිහි කරමින්

මැණික් ගගේ වතුර තැටිය අත ගා බැලුවම

බණ්ඩාරේ නුඹේ හිත දැක්කයි මං හොද හැටියට

මධුමලියේ නුඹේ සෙනෙහේ තරම දැනගත්තයි මම

මේ මැණික් ගගේ රැලි නැගෙන්නේ නැහැ ඒ තරමට

බණ්ඩාර අයියේ මේ පෝයට කතරගමට යං

දෙවියන්ගෙන් ඉල්ලන්න නොවෙයි වැඳලා එන්න යං

මධුමලීගෙ ආශාව නිසා එහෙනම් අපි යං

පහුගිය දොහේදි වෙච්ච බාර යළි සිහි කරමින්

ලොකු මුදලක් දී නොගත්තාට පුජා වට්ටිය

දෙවියන් ඉටු කර දේවි සංසාර පැතුම් පෙල

ඉල්ලන්න නොවේ ආවේ දෙවියනි නුඹ ගාවට

මොනවත්ම එපා අපි දෙන්නට තියෙනවා සෙනෙහස

බණ්ඩාර අයියේ මේ පෝයට කතරගමට යං

දෙවියන්ගෙන් ඉල්ලන්න නොවෙයි වැඳලා එන්න යං

මධුමලීගෙ ආශාව නිසා එහෙනම් අපි යං

පහුගිය දොහේදි වෙච්ච බාර යළි සිහි කරමින්

වීඩියෝ රුපරාමුව Music.lk යුටියුබ් චැනලයෙනි.

ගිරා මලිත්තා

ප්‍රචලිත නාමය: ගිරා මලිත්තා (Sri Lanka Hanging Parrot)

විද්‍යාත්මක නාමය: Loriculus beryllinus

ශ්‍රී ලංකාවට ආවේණික මෙම පක්ෂියා පහතරට තෙත් කලාපයේ වගාබිම් වල, කුඩා වනරොදවල හා ගෙවතු බිම් ආශ්‍රිතව සුලභව දැකිය හැකිය. ලංකාවේ සෑම ප්‍රදේශයකම වාගේ දැකිය හැකි වුවත්, විශේෂයෙන්ම පොල් කර්මාන්තය බහුලව ඇති ප්‍රදේශ ආශ්‍රිතව වැඩි වශයෙන් දැකිය හැකිය. පොල් ඉඩම් ආශ්‍රිතව වැඩි වශයෙන් දැකිය හැකි වීමට ප්‍රධානම හේතුව වන්නේ පොල් ගස්වලින් රා පෙරන කාලයේදී තෙලිජ්ජ බීමට දක්වන කැමැත්තයි. ඒ නිසාම ගිරා මලිත්තා "පොල් ගිරවා" නමින් ද හදුන්වයි.   

වේගයෙන් පියෑඹීමට අපූරු හැකියාවක් ඇති මෙම පක්ෂියාගේ නාදය තියුණුය. රංචු වශයෙන් බහුලව දැකිය නොහැකි, තනි තනිවම හෝ කුඩා කණ්ඩායම් වශයෙන් නිසංසල තුරු මුදුන් වල දැකිය හැකි, රතු පැහැති හිස මුදුනකින් හා කුඩා වලිග කොටසකින් යුතු මෙම අලංකාර පක්ෂියාගේ වක් වූ හොටය රතු පැහැතිය.

ඉදුණු පළතුරු, මල්පැණි හා කුඩා ධාන්‍ය වර්ග ආහාරයට ගනී. හොදින් වැඩුණු කුරුල්ලෙකු සෙන්ටිමීටර් 20 ක් පමණ දිගින් යුතු වේ. කුරුල්ලා හා කිරිල්ලිය පෙනුමෙන් එක සමාන වුවත් කිරිල්ලියට වඩා කුරුල්ලා වර්ණවත් බැවින් වැඩිය. බොහෝ විට තුරු මුදුනක පිහිටි ගස් බෙනයක් බිත්තර දැමීම සදහා තෝරා ගනු ලබයි. වරෙකට බිත්තර 2-3 ප්‍රමාණයක් දමනු ලබනු බවද සැළකේ. 

ගිරා මලිත්තාගේ ස්වාභාවික වාසස්ථානයන් වූ වනාන්තර හෙළිපෙහෙළි කිරීමත්, සීඝ්‍රයෙන් සිදුවන නාගරිකකරණයත්, පොල් වගාවේ සීග්‍ර විනාශයත්, මෙම අලංකාර පක්ෂියාගේ ජීවන පැවැත්මට අහිතකරව බලපාන ප්‍රධාන හේතුවක් වේ. එබැවින් ශ්‍රී ලංකාවට ආවේණික (ඒකදේශික ) පක්ෂියෙකු වූ ගිරාමලිත්තා නොහොත් පොල් ගිරවා වදවී යාමට නොදී, ඌ ජීවත්වන සුන්දර පරිසරය රැකගැනීම එයට ආදරය කරන අප සැමගේ යුතුකම වේ. 

සංචරණයට කෑගල්ල

ශ්‍රී ලංකාවට ආවේණික වූ පාරිසරික සමතුලිතතාවයකින් අනුන පහතරට තෙත් කලාපීය කදුකර පද්ධතීන්ගෙන් වටවූ සෞමය කාලගුණයක් සහිත, සබරගමුව පළාතට අයත් එක් දිස්ත්‍රික්කයකි කෑගල්ල. අවිවේකී වූ ජීවිතයේ විඩාබර මනස ස්වභාවධර්මයේ සුන්දරත්වයෙන් සන්තර්පණය කරමින් නිස්කලංකව ගෙවා දැමිය හැකි වටපිටාවන් මෙහි එමටයි.

• පින්නවල අලි අනාථාගාරය - පින්නවල, රඹුක්කන

පින්නවල අලි අනාථාගාරය වූ කලී කිසිදු පිළිසරණක් නොලැබ වනයේ අතරමංවූ කුඩා වල් අලින්ට සෙවන සළසන සොදුරු නවාතැනක්. කෑගල්ල දිස්ත්‍රික්කයේ රඹුක්කන නගරයට ආසන්න වන්නට පින්නවල ප්‍රදේශයේ මෙය පිහිටා තිබේ. කොළඹ සිට නුවර මහාමාර්ගය ඔස්සේ පැමිණියහොත් කිලෝමීටර් 90ක පමණ දුරකින්, කෑගල්ල නගරයේ සිට රඹුක්කන දක්වා යන අතරතුරදී හමුවන මේ ස්ථානයේ ආරම්භය වසර 1975 දී පමණ වූවායැයි සැළකේ.

ශ්‍රී ලංකාවේ ස්වාභාවික සෞන්දර්ය හා ජාතික උරුමයන් දැක බලා ගැනීමට එන දේශීය, විදේශීය සංචාරකයන් බොහොමයක් ඇදී එන ප්‍රසිද්ධ ස්ථානයක් වූ පින්නවල අලි අනාථාගාරයේදී, නිදහසේ තමනට රිසිපරිදි ලොකු කුඩා සද්දන්තයන් සමූහයක්, කිසිදු බධාවකින් තොරව එකවර නැරඹිය හැකියි.  එයින් වඩාත් සිත් ඇදගන්නා අවස්ථා වනුයේ දිනකට දෙවරක් සිදුකරනු ලබන ජලස්නානය හා කුඩා අලිපැටවුන්ට කිරිපොවන අවස්ථායි.

පින්නවල අලි අනාථාගාරයට යාබදව ගලාබස්නා මා ඔයේ දියකෙලින මේ සද්දන්තයන් සමූහය සැබවින්ම ඔබට සොදුරු චමත්කාර දසුනක් වනවා නොඅනුමානයි.

• බෝගල මිනිරන් පතල - අරුග්ගම්මන, කොටියාකුඹුර

කෑගල්ල අවිස්සාවේල්ල බස් මාර්ගයේ මත්තමගොඩ පතල් හන්දියෙන් හැරී හෝ කොටියාකුඹුර මංසන්ධියෙන් හැරී කිලෝමීටර් 5ක් පමණ ගිය විට බෝගල පතල් භූමිය හමු වේ. ගල් තලාව මත බෝ ගසක් තිබීම නිසා බෝගල වූවායැයි සැලකෙන මෙම ග්‍රාමයේ අතීතයේ මහබෝගල, කරදවත්ත, හා පුංචී බෝගල ලෙස පතල් තුනක් තිබුනේයැයි ප්‍රකට අතර, පසුව මේ සියල්ලගෙන්ම ඉතිරිව ඇත්තේ මහබෝගල පතල පමණි.

තාක්ෂණය දියුණුව නොපැවති එදා පතල් කම්කරුවන් අසීමිත දුක්ගැහැට ඔස්සේ කරන ලද මිනිරන් පතල් කර්මාන්තය අද නව්‍යයමය කළමනාකාරීත්වයකින් යුක්තව, නවීන තාක්ෂණයෙන් සන්නධ්දව උපරීම සුරක්ෂිතතාවයෙන් සිදුකරන අයුරු සියැසින් දැකබලා ගැනීමට නම් බෝගල මිනිරන් පතල හොදම සන්ධිස්ථානයක්.

නවීන තාක්ෂණයෙන්, උසස් ප්‍රමිතියකින් හා උපරීම සුරක්ෂිතතාවයකින් කැණීම් කටයුතු සිදුවන ලාංකීය මිනිරන් අපනයනයේ පුරෝගාමී ආයතනයක් වන මෙහි, මහපොළවතුල තම ජීවිකාව සරිකරගන්නා අපූරු දිරිය මිනිසුන් දැක බලාගෙන සදා නොමැකෙන අපූරු අත්දැකීමක් බෙදා හදා ගන්නට සොදුරු නිසංසල වටපිටාවකින් හෙබි බෝගල මිනිරන් පතල සංචරණයට කැමති ඔබට අමරණීය තැනක් වනවා නොඅනුමානයි.

සබැදි ලිපි:
බෝගල මිනිරන් පතල

• වට්ටාරම රජමහා විහාරය, ඉඹුල්ගස්දෙණිය, කෑගල්ල

ශ්‍රී අරහන්ත මලියදේව මහරහතන් වහන්සේ වැඩ සිටි බව සැළකෙන "වට්ටාරම ශ්‍රී අරහන්ත මලියදේව රජ මහා විහාරය" ඓතිහාසික මෙන්ම, බෞද්ධ සංස්කෘතික වශයෙන් ද ඉතා වටිනාකමකින් යුතු, නිසංසල පෙදෙසක පිහිටි අතිශයින්ම ආකර්ෂණීය පින් බිමක්. පොල්ගහවෙල නගරයේ සිට කෑගල්ල දෙසට වන්නට කිලෝමීටර හතරක පමණ දුරකින්ද, කෑගල්ල නගරයේ සිට පොල්ගහවෙල දෙසට වන්නට කිලෝමීටර් පහක පමණ දුරකින්ද පිහිටි ඉඹුල්ගස්දෙණිය නම් වූ ග්‍රාමයේ මෙම සුන්දර විහාරස්ථානය පිහිටා තිබේ.

මෙම පුද බිමට අතීතයේ "වට්ටාරම" යන නාමය යෙදී ඇත්තේ මේ භුමියේ එවකට ආරාම සමූහයක් පැවති නිසාවෙන් බව සදහන්. හතරවටින් මැදිවූ ආරාම හතරක් මැද තිබූ ආරාමයක ශ්‍රී අරහන්ත මලියදේව මහරහතන් වහන්සේ වැඩ සිටි නිසා "වටවූ ආරාම" ලෙස ව්‍යවහාර වී පසුව එය "වට්ටාරම" වූ බව ජනප්‍රවාදයේ සදහන් වේ.

වළගම්බා රජු සමයේ කරවන ලද විහාරස්ථානයක් වූ මෙයට පෙර රජදවස රාජ අනුග්‍රහය ලැබී තිබී ඇති මුත් පසුකාලීනව සිදුවූ යම්යම් ආක්‍රමණ හේතුවෙන් බොහොමයක් ආරාම දිරාපත් වී නටබුන් වී ඇති බවටයි සැලකෙන්නේ. මෙම විහාරභුමිය තුල පුරාණ විහාර මන්දිර, දෙතිස්ඵල බෝධිය, සෙල්ලිපි, තැන තැන විසිරුණු නටබුන් හා පැරණි විෂ්ණු දේවාලය අදටත් දක්නට ලැබේ.

මෑත කාලයේ ක්‍රමවත්ව සිදුකරන්නාවූ නැවුම් ප්‍රතිසංස්කරණ හේතුකොටගෙන දිරාපත්ව තිබු ආරාම, නටබුන් හා ප්‍රවේශ මාර්ගයන් සැදැහැවතුන්ගේ සිත්පහන් වන පරිද්දෙන් නිම කෙරෙමින් තිබේ. එලෙසින් නිමැවුණු චිත්තාකර්ෂණීය විහාර මන්දිරයත්, සුවිසල් පෞරාණික බෝධීන් වහන්සේත්, චෛත්‍යයත් නිසා මෙම පුදබිමට ඓතිහාසික මෙන්ම, සංචාරක වශයෙන්ද ඉතා වටිනාකමක් ප්‍රදානය වී තිබේ.

ආකර්ෂණීය පෙනුම හා පෞරාණිකත්වය හේතුකොට ගෙන සිත්ගන්නා මෙම පුජනීය ස්ථානය දෙස් විදෙස් සංචාරකයන්ගේ සොදුරු පින්බිමක් බැවින් කෑගල්ල නගරයේ සංචරනයට කැමති ඔබ නැරබිය යුතුම තවත් එක් ස්ථානයක්.

සබැදි ලිපි:
වට්ටාරම ශ්‍රී අරහන්ත මලියදේව රජ මහා විහාරය

• හොලොම්බුව ස්ත්‍රීපුර පුරාණ ලෙන් විහාරය  

කෑගල්ල අවිස්සාවේල්ල මාර්ගයේ අරන්දර මංසන්ධියෙන් හැරී දැදිගම මාර්ගය ඔස්සේ හෝ කොළඹ නුවර මාර්ගයේ නම් 45 සැතැපුම් කණුව අසල ගලිගමුව නගරයෙන් දකුණට දිවෙන අරන්දර හරහා අවිස්සාවේල්ල මාර්ගයේ කි.මීටර් 6 ක් පමණ ගිය තැන හමුවන පිටගල්දෙනිය මංසන්දියෙන් හැරී හොළොම්බුව මංසන්ධියෙන් පිටදෙණිය දැදිගම මාර්ගය ඔස්සේ සැතැපුම් 1/2ක් පමණ ගමන් කලවිට මෙම සුන්දර ස්ථානයට සමීප විය හැකි ය. ක්‍රමවත්ව සාදා නිමකර ඇති පියගැට පෙළ ඔස්සේ ඉතා උස් ස්ථානයක ගොඩවූ විට වටේට කඳු සහිත පරිසරය පැහැදිලිව දැක ගත හැකි අතර, උස්බිමේ වූ කඳු ගැටයක් ආශ්‍රයේ එයිතිහාසික ගල්ලෙන් රජමහා විහාර මන්දිරය ගොඩ නැගී තිබෙයි.

වළගම්බා රජු (ක්‍රි.පූ. 103) තම සේනා සංවිධානය කරමින් යන අතරතුරේ මෙම ස්ථානය තාවකාලික වාසස්ථානයක් ලෙසත්, තම පුරස්ත්‍රීන් සගවා තබාගත් ස්ථානයක් ලෙසත් භාවිතා කර ඇත. එහෙයින් මෙම ස්ථානය ස්ත්‍රී පුර ලෙසින් ප්‍රකට වී තිබේ. එකල පුරස්ත්‍රීන් දිය ස්නානය කල බව සැළකෙන දිය පොකුණක් මෙහි දැකිය හැකියි. එමෙන්ම සතුරන් හා සටන් වැදීමට රජු තම සේනා සංවිධානය කිරීම සදහා ඊට නුදුරින් පිහිටි යටහලෙන වෙත ගොස් නැවත පුරස්ත්‍රීන් සිටි තැනට සැපත්වීමට තැනු උමං මාර්ගයක්ද මෙම ලෙන තුල දක්නට ලැබේ. එසේම රජු මෙම ස්ථානයේ සිට දුණු ශිල්ප ප්‍රගුණ කල බවද කියැවේ.

ස්වභාවධර්මයේ සුන්දරත්වය ප්‍රියකරන ඔබට නිශ්කලංක පරිසරයක පිහිටි හොළොම්බුව ස්ත්‍රී පුර ගල් ලෙන් විහාරය සිත් සතන් ඇඳ බැඳ ගැනීමට සමත් වෙනවා නිසැකයි. 

• යටහලෙන රජමහා විහාරය, යට්ටෝගොඩ 

මෙම රජමහා විහාරය කොලබ නුවර ප්‍රධාන මාර්ගයේ යට්ටෝගොඩ බෙලිගල හන්දිය පසු කරනවිට හමුවන හන්දියෙන් කිලෝමීටර් 1 ක් පමණ දුර වතු මාර්ගයක් දිගේ ගිය විට හමුවේ. වසර 2000 කට වඩා වැඩි අතීතයකට උරුමකම් කියන යටහලෙන රජමහා විහාරය මහානාඝ යුව රජතුමා විසින් නිර්මාණය කරන ලද්දක් බව ජනප්‍රවාදයේ සදහන්. අලංකාර ලෙස කටාරම් කෙටු ගල් ලෙනක් තුල පිහිටා වති මෙම විහාරය තුල මහනුවර යුගයට අයත් යැයි සැළකෙන සිතුවම් හා ප්‍රතිමා දක්නට තිබේ. මෙම විහාරය වටා ස්වභාවික ලෙන් 13 ක පමණ පිහිටා ඇත.  මෙම ස්ථානයේ සිට උමගකින් හොලොම්බුව ස්ත්‍රීපුර ලෙන් විහාරස්ථානය දක්වා ගමන් කල හැකි මාර්ගයක් පැවති බව ජනප්‍රවාදයේ පැවසේ. එහෙත් එකී ලකුණු අද වන විට මෙහි දක්නට නොමැත.

• බිසෝවෙල රජමහා විහාරය, ගලිගමුව 

ගලිගමුව නගරයේ කොලබ නුවර මහා මාර්ගයට යාබදව පිහිටා ඇති අනුරාධපුර යුගයට අයත්යැයි සැළකෙන මෙම විහාරය කටාරම් කෙටු රමණීය ගල්ලෙනක් තුල පිහිටා ඇත. අතීතයේ රහතන් වහන්සේලා වැඩ සිටි බවට සාක්ෂි ඇති මෙම ගල්ලෙන තුල මහනුවර ‍යුගයට අයත්යැයි සැලකෙන අක්ෂර, බිතුසිතුවම් හා ප්‍රතිමා දක්නට ලැබේ. 

පැරණි ක්‍රමයට හීන් රැල්ල යොදා සැදු දොළොස් රියන් සමාධි පිළිම දෙකක්, අදින ලද අගසව් රූප දෙකක් චිත්‍ර කතා වශයෙන් ගල්ලෙනේ අදින ලද නාරිලතා චිත්‍ර හා වෙනත් පුරාන ක්‍රමයට අදින ලද චිත්‍ර රාශියක් මෙහි ඇත.

වළගම්බා රජුගේ බිසෝවරු දෙදෙනෙකු මෙම ප්‍රදේශයේ වාසය කල බවත් ඉන් එක් බිසවකගේ ඉල්ලීම පරිදි මෙම විහාරය කරවන ලද බවත් එම බිසව විසින් විහාරස්ථානයට පුජා කරන ලද වෙලක් නිසා මෙම රජ මහා විහාරය බිසෝවෙල රජමහා විහාරය ලෙසින් ජනප්‍රියත්වයට පත්වූ බවත් ජනප්‍රවාදයේ සදහන්.

• මාම්පිට වළගම්බා ගල්ලෙන් රජ මහා විහාරය, වේරගොඩ

කොලබ නුවර මාර්ගයේ යට්ටෝගොඩ මංසන්ධියෙන් වේරගොඩ පාරේ මීටර් 400 ක පමණ ගිය විට මෙම විහාරයට ප්‍රවේශ වන මාර්ගය හමුවේ. එම මාර්ගයේ කිලෝමීටරයක් පමණ ගියවිට මෙම අලංකාර පුදබිම දැකගත හැකිය.

වළගම්බා රජු තම වාසස්ථානයක් ලෙස භාවිතා කර ඇති මෙම ලෙන තුල අදවනවිට ප්‍රතිමා, මුර්ති සහ නුවර යුගයේ චිත්‍ර දක්නට ලැබේ. උස් පර්වතයක මධ්‍යයට වන්නට ඉතා අලංකාර ලෙස මේ ලෙන් විහාරය නිර්මාණය කර ඇත.

• බැරැන්ඩි කෝවිල - තල්දූව, අවිස්සාවේල්ල

ක්‍රි.ව. 1581-1593 සමයේදී රාජ්‍ය පාළනය කල පළමුවන රාජසිංහ රජදවස සීතාවක රාජධානියේ අග නගරය වූ වර්තමානයේ අවිස්‌සාවේල්ල නමින් හැදින්වෙන නගර සමීපයේ මෙය පිහිටා ඇත. අවිස්‌සාවේල්ල සිට හැටන් දක්වා දිවෙන මාර්ගයේ සීතාවක පාලමට පසුකරනවාත් සමගම හමුවන තල්දූව නගර හංදියේ සිට මීටර් සියයක පමණ දුරින් බැරැණ්ඩි කෝවිල දැක ගත හැකිය.

බැරැණ්ඩි කෝවිල සීතාවක රාජධානියේ රජකල පළමුවන රාජසිංහ රජු විසින් (ක්‍රි.ව. 1581-1593) ඔහුගේ උපදේශකයා ලෙස පත්කරගත් අරිට්ට කී වෙණ්ඩු පෙරුමාල් නැමැති හින්දු භක්තිකයාගේ උපදෙස් මත ඉදිකරන ලදැයි සැළකේ. ජනප්‍රවාද වලට අනුව පළමුවන රාජසිංහ රජු  සිය පියා වූ මායාදුන්නේ රජු ඝාතනය කිරීමෙන් ඇතිවූ සිත්වේදනාවෙන් මිදීම පිණිස තම උපදේශකයගේ උපදෙස් පරිදි හින්දු භක්තිකයෙකු බවට පත්වී තමා සිදුකල පාපකර්මයෙන් මිදීම පිණිස මෙම කෝවිල ඉදිකළ ඇතැයි  සැළකේ. පසු කාලීනව පෘතුගීසීන්ගේ ආක්‍රමණයනට හසුව නෂ්ටාවශේෂ බවට පත්ව තිබූ මෙම ස්ථානය 1896 වර්ෂයේදී එච්.සී.පී. බෙල් මහතා විසින් සොයාගෙන ප්‍රතිසංස්කරණය කොට තිබේ.

ශිලාමය කලාත්මක කැටයම් වලින් සමන්විත වූ කලුගල් වලින් නිමවා ඇති සුන්දර සීතාවක ගංමිටියාවතේ පිහිටා ඇති පෞරාණික ස්ථානයක් වන මෙය එයිතිහාසික සීතාවක රාජධානියේ නැරඹිය යුතුම තවත් එක් අමරණීය ස්ථානයක් වනවා නොඅනුමානයි.

• පෙතංගොඩ කටු උණ පදුර - පෙතන්ගොඩ, කන්නත්තොට

කෑගල්ල-අවිස්සාවේල්ල මාර්ගයෙන් පැමිණ අගුරුවැල්ල නගරයෙන් හෝ කන්නත්තොට නගරයෙන් හැරී කිලෝමීටර් 5-6 ක පමණ දුරක් යනවිට මෙම ස්ථානය ඔබට හමුවේ. 

හෙළයේ රණකාමී ශ්‍රේෂ්ඨ රජෙකු වූ සීතාවක රාජසිංහ නොහොත් පළමුවන රාජසිංහ රජුගේ මගුල් උයන පිහිටි ස්ථානය යැයි සැළකෙන පෙතංගොඩ උයන් භූමිය පෞරාණික වශයෙන් වැදගත් වන්නේ අදටත් එහිදී දකින්න පුලුවන් කටු උණ පදුරු යුගලය නිසයි.

ක්‍රිස්තු වර්ෂ 1592 දී පමණ පෘතුගීසීන් හා ඇතිවූ යුද්ධයෙන් පරාජය ලැබූ රාජසිංහ රජු සීතාවක පිහිටි මෙම උයනට පැමිණ ඇති අතර, එහිදී කටු උණ පදුරේ උණ කටුවක් ඇණී විෂවීමෙන් මරණයට පත්වූ බවට ප්‍රකටයි.

• ගනේගොඩ ලෙන් විහාරය, අලවතුර, බුලත්කොහුපිටිය

කෑගල්ල බුලත්කොහුපිටිය මාර්ගයේ අලවතුර නගරයෙන් හැරී ටිකදුරක් ගියපසු මේ සිත්ගන්නා විහාරය අපට  හමුවේ. පුරාවිද්‍යා දෙපාර්තමේන්තුව විසින් සවිකරන ලද පුරාවිද්‍යාත්මක ස්ථානයක් ලෙසින් දක්වා ඇති දැන්වීම් පුවරුව සහිත ගමන්මග සොයාගැනීම ඔබට එතරම් අපහසුවන්නේ නැහැ. ගඩලාදෙණිය හා ලංකාතිලක විහාරයේ ඇති ගෘහ නිර්මාණ ශිල්පයනට හා කලාත්මක කැටයම් වලට සමාන ලක්ෂණ දක්වන මෙම ස්ථානය කෑගල්ල දිස්ත්‍රික්කයේ පිහිටි ගලින් තනන ලද එකම ලෙන්විහාරය බවටද සැළකේ.

සබැදි ලිපි:

1. ශ්‍රී ලංකාතිලක රජ මහා විහාරය

2. ගඩලාදෙණිය ශ්‍රී සද්ධර්මතිලක රජමහා විහාරය

• ඕලු ඇල්ල, අමනාවල, යටියන්තොට   

• සුරඹ ඇල්ල, වාගොල්ල හන්දිය, බුලත්කොහුපිටිය

කැළණි ගගේ අතු ශාඛාවක් වන රිටිගහ ඔයට, මේ දියඇල්ලෙන් ගලන දිය දහර එකිනෙක හමුවන්නේ වාගොල්ල හන්දියට මදක් ඔබ්බෙනි.  උසින් මීටර් 20-25 ක් පමණ වූ මේ දියඇල්ල බුලත්කොහුපිටිය - අවිස්සාවේල්ල ප්‍රධාන මාර්ගයේ සිටම වුවද පැහැදිලිව දෘෂ්‍යමාන වේ. කෑගල්ල - බුලත්කොහුපිටිය මාර්ගයෙන් බුලත්කොහුපිටිය නගරයට පැමිණ හෝ අවිස්සාවේල්ල - බුලත්කොහුපිටිය (මාර්ග අංක 677) මාර්ගයෙන් වාගොල්ල හන්දියට පැමිණ මේ සොදුරු දියදහර ඔබට නැරඹිය හැකියි.

• රිකිල්ල ඇල්ල - උඩපොත, බුලත්කොහුපිටිය

කැළණි ගගේ අතු ශාඛාවක් වන රිටිගහ ඔයට එකතු වන රිකිල්ල ඇල්ල උසින් මීටර් 30 ක් පමණවේ. කෑගල්ල - බුලත්කොහුපිටිය මාර්ගයෙන් හෝ අවිස්සාවේල්ල - බුලත්කොහුපිටිය (මාර්ග අංක 677) මාර්ගයෙන් බුලත්කොහුපිටිය නගරයට පැමිණ බුලත්කොහුපිටිය දේදුගල මාර්ගයේ කිලෝමීටර් 5 ක් පමණ ඉදිරියට යනවිට මේ සුන්දර දියඇල්ල අපට හමුවේ.

• නලගන ඇල්ල - නෙලුවක්කන, බුලත්කොහුපිටිය

කෑගල්ල - බුලත්කොහුපිටිය මාර්ගයෙන් හෝ අවිස්සාවේල්ල - බුලත්කොහුපිටිය (මාර්ග අංක 677) මාර්ගයෙන් බුලත්කොහුපිටිය නගරයට පැමිණ බුලත්කොහුපිටිය දේදුගල මාර්ගයේ කිලෝමීටර් 9 ක් පමණ ඉදිරියට යනවිට මේ සුන්දර දියඇල්ල අපට හමුවේ.

• රුක්මල් ඇල්ල - දේදුගල, බුලත්කොහුපිටිය

කෑගල්ල-බුලත්කොහුපිටිය මාර්ගයෙන් හෝ අවිස්සාවේල්ල-බුලත්කොහුපිටිය (මාර්ග අංක 677) මාර්ගයෙන් බුලත්කොහුපිටිය නගරයට පැමිණ බුලත්කොහුපිටිය දේදුගල මාර්ගයේ කිලෝමීටර් 12 ක් පමණ ඉදිරියට යනවිට මේ සුන්දර දියඇල්ල අපට හමුවේ.

මහාමාර්ගයේ සිටම නැරඹිය හැකි මීටර් 20ක පමණ උසකින් යුතු මේ සුන්දර දියඇල්ල ගල්තලාව පුරා සුන්දරව විහිදී තිබේ.ස්වාභාවික දියඋල්පත් වලින් හා නිරිතදිග මෝසම් සමයේදී මේ ප්‍රදේශයට ඇදහැලෙන වැසි ජලයෙන් මනාව ස්වයංපෝෂිත වන රුක්මල් ඇල්ලේ සිසිලස මහාමාර්ගය අයිනේ සිටම අත්විදිය හැකිය. විටෙක ඔබව පින්නෙන් නැහැවෙන තරමටම ...


අවසාන යාවත්කාලීන කිරීම: 2017-02-24